முட்டை விலை குறைப்புக்கு எதிர்ப்பு: ரூ.18க்கு விற்க முடியாது என உற்பத்தியாளர்கள் வலியுறுத்தல்

ஒரு முட்டையை பதினெட்டு ரூபாய்க்கு விற்பனை செய்ய முடியும் என கூறியமைக்கு எதிர்ப்பு தெரிவித்து முட்டை உற்பத்தியாளர்கள் மற்றும் வர்த்தக சங்கங்கள் ஹெட்டிபொல காவல் நிலையத்தில் முறைப்பாடளித்துள்ளதாக அறியமுடிகிறது.சந்தையில் முட்டை விலை குறையும் என்ற நம்பிக்கையில் வியாபாரிகளும், நுகர்வோரும் முட்டையை வாங்குவதை தவிர்த்து வருவதாகக் குறித்த சங்கங்கள் கூறியுள்ளன.இருப்பினும், தற்போதைய உற்பத்தி செலவுகளைக் கருத்தில் கொண்டு, ரூ.18க்கு ஒரு முட்டையை விற்க முடியாது என்று அகில இலங்கை முட்டை வர்த்தகர்கள் சங்கத்தின் செயலாளர் அனுர மாரசிங்க தெரிவித்துள்ளார்.ஒரு முட்டையின் விலை சுமார் 30 ரூபாயாக இருக்கும் எனவும் அவர் மேலும் தெரிவித்தார்.இதேவேளை, டிசம்பர் வரை தட்டுப்பாடு இல்லாமல் முட்டைகளை விற்பனை செய்ய வாய்ப்பு இருப்பதாக முட்டை உற்பத்தியாளர்கள் சங்கத்தின் செயலாளர் எச்.எம்.பி. அலஹகூன் கூறினார்.அண்மையில் வெளியாகிய தகவல்களைக் கருத்தில் கொண்டு, முட்டை உற்பத்தியாளர்கள் நெருக்கடியை எதிர்கொண்டால், அதற்கு அரசாங்கமே பொறுப்பேற்க வேண்டும் என்று அவர் மேலும் கூறினார்.