கொழும்பு, வார்ட் பிளேஸ் பகுதியில் நிறுத்தி வைக்கப்பட்டிருந்த முச்சக்கர வண்டிக்குள் கூரிய ஆயுதங்களால் குத்தி கொலை செய்யப்பட்ட நபரின் சடலம் கண்டெடுக்கப்பட்டுள்ளதாக பொலிஸார் தெரிவித்துள்ளனர். உயிரிழந்தவர் 33 வயதுடைய இளைஞர் என அடையாளம் காணப்பட்டுள்ளார்.இன்று (23) அதிகாலை 1.00 மணியளவில் கறுவாத்தோட்டம் பொலிஸாருக்கு கிடைத்த தகவலின் அடிப்படையில் குறித்த முச்சக்கரவண்டி வார்ட் பிளேஸில் உள்ள தேசிய பல் வைத்தியசாலைக்கு முன்பாக நிறுத்தி வைக்கப்பட்டிருந்த நிலையில் கண்டுபிடிக்கப்பட்டுள்ளது. பின்னர் குறித்த முச்சக்கரவண்டி தொடர்பில் மோட்டார் போக்குவரத்து திணைக்களத்திடம் பொலிஸார் வினவிய போது அது மித்தெனிய பிரதேசத்தில் வசிக்கும் ஒருவரின் பெயரில் பதிவு செய்யப்பட்டிருந்தமை தெரியவந்துள்ளது. வாடகை வண்டி சாரதியான தனது 33 வயதுடைய மைத்துனருக்கு வாகனத்தை வழங்கியதாக முச்சக்கர வண்டியின் உரிமையாளர் தெரிவித்துள்ளார்.
கறுவாத்தோட்டம் பொலிஸார் மேலதிக விசாரணைகளை மேற்கொண்டு வருகின்றனர்.
