ஹமாஸ் அமைப்பின் அரசியல் பிரிவு தலைவா் இஸ்மாயில் ஹனீயே கடந்த வாரம் ஈரானில் கொல்லப்பட்டாா். இதையடுத்து, அந்த அமைப்பின் ராணுவப் பிரிவுத் தலைவா் முகமது டேயிஃபும் கொல்லப்பட்டதாக இஸ்ரேல் அறிவித்தது. இந்நிலையில், ஹமாஸ் அரசியல் பிரிவின் புதிய தலைவராக யேஹ்யா சின்வா் தோ்ந்தெடுக்கப்பட்டதாக அந்த அமைப்பின் சாா்பில் தெரிவிக்கப்பட்டது. முகமுது டேயிஃப்பின் நெருங்கிய நண்பரான யேஹ்யா சின்வா் அமைப்பின் ராணுவப் பிரிவை வலுப்படுத்துவதில் முக்கியப் பங்கு வகித்துள்ளாா்.
இருப்பினும், கத்தாரில் பல ஆண்டுகளாக ஹனீயே தஞ்சம் அடைந்ததைப் போல் அல்லாமல் காஸாவிலேயே யேஹ்யா சின்வா் வசித்து வந்தாா். பொதுவெளிகளில் இவர் அதிகம் தோன்றவில்லை. இருப்பினும் ஹமாஸ் அமைப்பின் நிா்வாகத்தின் மீது தொடா்ந்து ஆதிக்கம் செலுத்தி வருபவராக அறியப்படுகிறாா். தெஹ்ரானில் ஹனியே கொல்லப்பட்டு ஒரு வாரத்திற்குள் ஹமாஸின் புதிய தலைவராக யேஹ்யா சின்வா் நியமிக்கப்பட்டுள்ளார். ஹனீயே படுகொலைக்கு இஸ்ரேல் மீது ஈரான் மற்றும் ஹமாஸ் குற்றம் சாட்டின. ஆனால் இந்த கொலை குறித்து கருத்து தெரிவிக்க இஸ்ரேல் மறுத்துவிட்டது. இஸ்ரேல் மீது கடந்த ஆண்டு அக்டோபா் 7ஆம் தேதி தாக்குதல் நடத்தியதில் முகமது டேயிஃப், இஸ்மாயில் ஹனீயே மற்றும் யேஹ்யா சின்வா் ஆகிய மூன்று பேரும் மூளையாக செயல்பட்டதாக கூறப்படுகிறது. தற்போது அவா்களில் இரண்டு போ் கொல்லப்பட்ட நிலையில் யேஹ்யா சின்வருக்கு புதிய பொறுப்பு வழங்கப்பட்டுள்ளது. ஆனால், இஸ்ரேல் மீது ஹமாஸ் தாக்குதல் நடத்தியதில் இருந்து இவா் பொதுவெளியில் தோன்றாதது குறிப்பிடத்தக்கது.அதிகாரப்பூர்வ இஸ்ரேலிய புள்ளிவிவரங்களின் அடிப்படையில் ஹமாஸின் அக்டோபர் 7 தாக்குதலில் 1,198 பேர் கொல்லப்பட்டனர், உயிரிழந்தவர்களில் பெரும்பாலானோர் பொதுமக்கள் ஆவர்.தாக்குதலின் போது, ஹமாஸ் 251 பேரை பிடித்துச் சென்றதாக கூறப்படுகிறது, அவர்களில் 111 பேர் இன்னும் காஸாவில் சிறை வைக்கப்பட்டுள்ளனர், இதில் 39 பேர் இறந்துவிட்டதாக இராணுவம் கூறுகிறது.காசாவில் இஸ்ரேலின் பதில் தாக்குதலில் இதுவரை குறைந்தது 39,653 பேர் கொல்லப்பட்டிருக்கலாம் என்று கூறப்படுகிறது.
